Riken Yapon davlat tadqiqot instituti yangi avlod superkompyuterini yaratish ustida ish olib bormoqchi. Loyihaga 140 milliard yen (1,37 milliard dollarga yaqin) miqdorida mablag‘ ajratilib, u 2020-yilda yakunlanishi rejalashtirilgan, deb yozadi “ITAR-TASS”.

Foto: itar-tass.com

               Aytish kerakki, Riken instituti tomonidan avval yaratilgan “Key” superkompyuteri tezkorligiga ko‘ra dunyoda to‘rtinchi o‘rinni egallaydi. Yangi yaratiladigan qurilma esa undan 100 baravar qudratli bo‘lishi xabar qilinmoqda. Yapon olimlari “Key”dan ham foydalanishda davom etishadi; kompyuter texnikasining yangi mo‘jizasi ham avvalgisining yonida – Kobe shahri yonidagi Port-Ayland sun’iy orolida joylashtiriladi.

Loyiha ustida asosan Riken instituti olimlari ishlashadi, lekin chetdan mutaxassislar va investorlar ham jalb etilishi mumkin. Yangi superkompyuter bir soniyada bir kvintillion (10 ning 18-darajasi) amalni bajara oladigan bo‘ladi. Bu esa shu borada yetakchi bo‘lgan, Xitoy armiyasi Mudofaa fan va texnikasi universiteti tomonidan yaratilgan “Tyanxe-2” tezligidan ham yuqori ko‘rsatkichdir.

Yapon mutaxassislari yaratilajak superkompyuter tabiiy ofatlar jarayonlarini modellashtirishda va avtomobil sanoatida qo‘l kelishiga umid qilishmoqda.